التّلك أو Talc ارتبط بتطور سرطان المبيض عند المرأة

نهار صيف سخون، تكون خارجة تمشي في الشمس، تمشي برشة تعرق، يصير عندك شوية تسلخات في الفخاذ من داخل ربما، تحط البودرة السحرية، أو كذلك في نفس الجو الحار تستعملو لامتصاص رطوبة ورائحة المهبل، نعم نحكيو على بودرة الطّلق أو التّلك أو Talc أو سليكات المغنيسيوم المهدرجة، هاك المسحوق الأبيض “السحري” الي يحطوه للرضيع باش يقعد نظيف وشايح من لوطة، للصغار يتم استعمالو بالأساس حول العالم، ولكن البالغين كذلك يستعملو فيه بشكل مكثف برشة في كامل أصقاع الأرض، وخاصة النساء كما ذكرنا كحل سريع للمناطق الحميمة متاعهم بحكم التركيبة الفريدة والفعالة الي فيه، لكن، البارح، منظمة الصحة العالمية، تصنفوا رسميا “كمادة ممكن تكون مسرطنة”.

الطّلق أو التّلك هو معدن موجود في الطبيعة، ويتكون بشكل أساسي من المغنيسيوم والسيليكون والأكسجين، الصيغة الكيميائية متاعو هي Mg3Si4O10(OH)2، ومشهور برشة بالنعومة متاعو بل يُصنف على أنو المعدن الأكثر ليونة على مقياس موس Mohs للصلابة، لونو ممكن يختلف من الأخضر والأبيض والرمادي إلى البني أو عديم اللون، ويتشكل وقت المعادن الغنية بالمغنيسيوم كيف السربنتين والأمفيبول تتحول، ويوجد عادة في الصخور المتحولة كيف الشست Schist والحجر الأملس Soapstone، وطبعا بسبب الخصائص الطبيعية الفريدة متاعو، أصبح عندو قيمة في مجموعة واسعة من التطبيقات حول العالم، على غرار مستحضرات التجميل والسيراميك والأدوية والاستخدامات الصناعية الخ الخ.

المهم، البارح، الوكالة الدولية لأبحاث السرطان التابعة لمنظمة الصحة العالمية، صنفت رسميا التلك على أنو من المحتمل أنو يكون مسرطن للبشر، التصنيف هذا طبعا اعتمد برشة أدلة عندها سنوات طويلة جدا، خاصة دراسة تنشرت في دورية Journal of Clinical Oncology (موجودة في المراجع) لقات زيادة في معدل الإصابة بسرطان المبيض بين النساء الي يستعملو في المسحوق هذا على الأعضاء التناسلية متاعهم، كذلك دراسة أخرى تنشرت في دورية The Lancet، طبعا الدراسات هذي ماهيش نهائية مائة في المائة وما تمش اثبات علاقة سببية مليون في المائة بينها، لكن الخطر موجود ومرتفع خاصة في دراسات صارت على الفئران لقات بشكل دامغ ومباشر أنو وضع التلك على المناطق التناسلية عند أنثى الفأر ارتبط بتطور سرطان المبيض، كذلك مجموعة دراسات مخبرية أهرى وفرت كذلك أدلة قوية على أنو التلك عندو خصائص مسرطنة في الخلايا البشرية، وعلى الرغم من أنو مازال ما تمش تحديد الكيفية كيفاش تصير بالضبط عند البشر يعني إلا أنها موجودة.

الجدير بالذكر هنا أنو شركات عملاقة في المجال على غرار  Johnson & Johnson، دفعت المدة الفايتة 700 مليون دولار باش تسوي دعوى قضائية ترفعت ضدها بأنها تستعمل في مواد ممكن تكون مسرطنة بشكل كبير برشة على مستوى العالم التلك يعني المشهور متاعها، بل سحبت كميات صخمة من الاسواق الأمريكية سنة 2019 بسبب انو لقاو في عبوات التلك مادة الأسبستوس Asbestos المسرطنة (معروفة انها مسرطنة وخطيرة جدا) وسنة 2020 توقفت عن بيع Talc هذا في أمريكيا الشمالية، وقعدت تبيع فيه عالميا على ما يبدو، وعليه، آنساتي سيداتي، بما أنو منظمة الصحة العالمية قرعت جرس الخطر، فالقصة يعني مقلقة برشة، وعلى ما يبدو واضح المسار متاعها، ولهذا من المستحسن التوقف تماما عن استعمال المسحوق هذا والتوجه لبدائل أخرى آمنة.

تنويه هام: في نفس الدراسات، منظمة الصحة العالمية تصنف الأكريلونيتريل Acrylonitrile على أنو مادة مسرطنة من المجموعة الأولى، وهو سائل عديم اللون يتميز برائحة قوية برشة، ويستعملوه أساسا في إنتاج البوليمرات، بما في ذلك ألياف الأكريليك، والمطاط الاصطناعي، والبلاستيك، كما نلقاو كميات صغيرة منو في الدخان متاع السجائر.

المراجع للتعمق – الورقات البحثية + تصريح منظمة الصحة العالمية هنا هنا هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون