العلماء يتوصلون لخريطة استهلاك اللدائن البلاستيكية حول العالم

العلماء يتوصلون لخريطة استهلاك اللدائن البلاستيكية حول العالم، وتونس في مرتبة يُدقّ فيها ناقوس الخطر

في العديد من المقالات السابقة، كنا تعرضنا حقيقة لمشكلة اللدائن البلاستيكية أو Microplastics الي لقاو أنها مثلا متسببة في تشكل تجلطات في الدم وكذلك لقاوها موجودة في السائل المنوي مؤذنة طبعا بكارثة إنجابية عالمية، وكذلك في دراسة سابقة لقاوها موجودة في نسبة كبيرة برشة من عينات الحليب متاع الأم، الخ الخ، البارح وفي ورقة بحثية جديدة منتظرة عملوها فريق من الباحثين من جامعة كورنيل وتنشرت في دورية Environmental Science and Technology، نشروا فيها الخريطة متاع البلدان الي عندها أعلى استهلاك متاع اللدائن البلاستيكية الدقيقة الي تدخل للجسم من الأكل والشرب أو الإستشناق.

الدراسة سلّطت الضوء على أنو الناس، في المتوسط، يستهلكو ما يعادل كمية البلاستيك الموجودة في البطاقة البنكية كل أسبوع كما ذكرنا من قبل، لكن الكمية هذي تختلف بشكل كبير حسب الدول. يعني. المدخول الغذائي من المواد البلاستيكية الدقيقة مرتفع بشكل ملحوظ في مثلا في جنوب شرق آسيا، وين تتصدر إندونيسيا وماليزيا والفلبين القائمة، الإندونيسيون يستهلكوا ما يقارب من 15 غرام من اللدائن البلاستيكية كل شهر، معظمها جاية من المأكولات البحرية (أغلفة الخ)، وفي المقابل، المدخول الغذائي في الولايات المتحدة للمواد هذي يبلغ حوالي 2.4  شخريا، في حين أنو الباراغواي مثلا عندها أقل كمية مدخول توصل إلى 0.85 غرام شهريا.

بالنسبة لمنطقتنا العربية، وحسب البينات الي توفرت، تتصدر مصر المرتبة الأولى كأكبر مستهلك لللدائن البلاستيكية هذي بواقع 388.5 مليغرام يوميا يعني 11.8 غرام شهريا وممبعدها مباشرة تجي تونس بواقع 214.8 يعني 6.4 غرام شهريا وبعدها الدول العربية الأخرى والفجوة كبيرة وين مثلا الجزائر بواقع 82.6 مليغرام يوميا والسعودية 74.4 مليغرام يوميا والمغرب 52.6 مليغرام يوميا، وأقل بلد عربي كان سوريا بواقع 31.8 مليغرام يوميا (شوف الفرق بين مصر مع تونس وباقي الدول العربية، مخيف ومرعب يعني حقيقة).

بالنسبة لاستنشاق اللدائن هذي توا، اختلف توزعها حسب البلد وتصدرت منغوليا والصين الفئة عذث، وين يستنشق المواطنين عندهم أكثر من 2.8 مليون جزيء بلاستيكي شهريا، وتجي بعدها المملكة المتحدة وإيرلندا، وين يتم استنشاق 791500 جسيم شهرياc ومع ذلك، احتلت الولايات المتحدة المرتبة الأخيرة تقريبا في المركز 104 من بين 109 دول، حيث يتم استنشاق 10500 جزيء فقط شهريا، وحتى الرقم هذا حسب الفريق مرتفع برشة، نجيو توا للمنطقة متاعنا، وين مصر كالعادة تتصدر الإستنشاق بواقع حوالي 388.5 جزيء في 1000 جزي في الهواء للفرد في اليوم (أكثر من الصين على مستوى الفرد) وبعدها تونس 214.8 جزيء من 1000 جزيء في الهواء تقريبا ثلاثة أضعاف الولايات المتحدة على المستوى الفردي، وطبعا ممبعد يجيو الدول العربية الأخرى تباعا بعاد على تونس ومصر.

هاوكا ناقوس خطر واضح عبر دراسة متكاملة لبرشة دول باش تبدى تاخذ اجراءات صارمة ومنها تونس بلدنا، الي محتل المرتبة الثانية مع مصر، يعني تونس ومصر إلى أين بالضبط ؟ وين ماشين ؟ 

البيانات الواردة في الدراسة صارت بين سنة 1990 و2017

الورقة البحثية رفعتها هنا بحكم أنها ليس متوفرة للعموم للأسف

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون