الحياة تشكلت على الأرض أبكر مما كنت نعتقد 

قبل حوالي +/- 4.5 مليار سنة، كوكب الأرض تشكل من سديم شمسي، سحابة جبارة من الغاز والغبار خلفتها عملية التكوين متاع نجم مجموعتنا الشمسية، المواد هذي الكل ممبعد سحبتهم الجاذبية باش تكوّن كواكب مصغّرة والي فيما بعد اصطدمت واندمجت مع بعضها باش تشكل الكواكب الأولية، وطبعا واحد من الكواكب الأولية هذي أصبح كبير بما يكفي باش يولي الأرض، ثم، الحرارة الشديدة الناتجة عن الاصطدامات والتحلل الإشعاعي، ذوبت جزء كبير برشة من الكوكب متاعنا، الشيء الي عطاه الطبقات الأساسية متاعو إضافة إلى الوشاح والقشرة، وفي نهاية المطاف، الغازات البركانية انطلقت في الجو والماء وصل عن طريق المذنبات والكويكبات باش كوّن المحيطات والغلاف الجوي، الشيء الي مهد الطريق لتطور الحياة.

كنا نعرفو أنو الحياة نشأت قبل حوالي 3.8 مليار سنة، يعني بعد حوالي 700 مليون سنة من وقت تشكل الكوكب الأزرق، لكن في دراسة جديدة وثورية، تبين أنو الحياة في الحقيقة تشكلت قبل ذلك، الورقة البحثية خرجت البارح قاموا بها فريق من الباحثين من جامعة بريستول وتنشرت في دورية Nature، كشفت عن رؤى جديدة حول النظام البيئي المبكر متاع الأرض، الشيء الي دل على أنو الحياة بدأت تزدهر خلال بضع مئات الملايين من السنين من بداية التكوين متاعو، الدراسة هذي ركزت على LUCA، Last Universal Common Ancestor أو السلف المشترك العالمي الأخير، والي يُعتقد أنو الجد الوحيد الي تنحدر منو جميع أشكال الحياة الخلوية الحديثة، البكتيريا، والعتائق، وحقيقيات النوى، السلف هذا كيف الجذر متاع شجرة الحياة قبل ما تنقسم إلى المجالات الأساسية الثلاثة الي ذكرناها. 

هنا، من المعلوم أنو أشكال الحياة الحديثة تشترك في المكونات البيولوجية الأساسية مع السلف هذا، على غرار الأحماض الأمينية باش تخلّق البروتين protein synthesis، و أدينوسين ثلاثي الفوسفات للطاقة والريبوسومات Ribosomes باش يتم انتاج البروتينات من الحمض النووي، ومن خلال تحليل الجينات عند الأنواع الحية ومقارنتها بالطفرات مع مرور الوقت، الفريق لقى إنو السلف هذا توجد قبل 4.2 مليار سنة يعني تقنيا بعد حوالي 400 / 300 مليون سنة فقط من التكوين متاع الأرض، النتيجة هذي توافقت مع الفرضيات الي تحطت من قبل حول قابلية نشأة الحياة على الأرض في وقت مبكّر، هنا الفريق كذلك تحقق من الفيسيولوجيا متاع السلف هذا من خلال وتتبعوا الخصائص التطورية للأنواع الحية وصولا له باستخدام نماذج متقدمة باش يوفقوا  بين تاريخ الجينات وعلم النسل متاع الأنواع. 

النتائج الي لقاوها كشفت على أنو السلف هذا كان كائن معقد يتمتع بجهاز مناعي مبكر، وشارك في سباق تسلح مع الفيروسات منذ حوالي 4.2 مليار سنة، ومن المحتمل أنو عاش في نظام بيئي مبني على اعادة التدوير وين الفضلات متاعو غذّات ميكروبات أخرى، السلف العالمي المشترك هنا فقط للتوضيح هو كان كائن وحيد الخلية توجد عاش قبل حوالي 4.2 مليار سنة مما ذكرنا، بسيط في البنية متاعو، مشابه للبكتيريا الحديثة، ويستخدم الحمض النووي باش يخزّن المعلومات الوراثية وعندو الآلية الأساسية لإنتاج البروتينات، الكائن هذا هو نقطة البداية الي تطورت منها جميع أشكال الحياة على الأرض ومحاولات انتاجه في المختبرات جارية على قدم وساق ونجحت في برشة مرات، دائما وأبدا للإجابة عن السؤال الكبير متع الأرض، هل كان كل هذا حقا مجرّد صدقة ؟

المراجع للتعمق – الورقة البحثية هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون