العلماء يحققون النقل الآني Teleportation بين أجهزة الكمبيوتر الكمومية

 في ورقة بحثية ثورية جديدة قام بها فريق من الباحثين من جامعة أكسفورد وتنشرت في دورية Nature، وفي إنجاز علمي استثنائي بدا وكأنو خيال علمي أصبح حقيقة، الفريق نجح وفي سابقة عالمية باش يعملو نقل آني أو Teleportation متاع معلومات كومية بين جهازي كمبيوتر كمومي، وين لقاو طريقة ثورية ينجمو ينقلو بها الخواص المميزة متاع البتات الكمومية أو quantum bits أو qubits من كمبيوتر إلى آخر على الفور، يعني باش نفهمو التجربة شوية، تخيل الحكاية هذي كيف نردين سحريين متصلين بطريقة خاصة بحيث كل حاجة تعملها على واحد تؤثر على الآخر على الفور مباشرة، حتى لو كانت المسافة بينهما متباعدة، الفريق نجح باش يعمل الشيء هذا مسافة مترين بدقة مذهلة بلغت 86٪؜, بين زوز كمبيوترات كمومية، حاجة تشبه برشة لتسعة محاولات ناجحة من جملة 10 وهذي نسبة جبّارة في المجال هذا.

الإكتشاف هذا ثوري بكل المقاييس حقيقة، لأنو لازم نفهموا بداية كيفاش تختلف أجهزة الكمبيوتر الكمومية عن أجهزة الكمبيوتر العادية الي عندنا الكل، أجهزة الكمبيوتر العادية كما نعرفوا تخدم بخيارات بسيطة كيف “نعم” أو “لا” (1 أو 0)، كيف ما تحل انت الضوء وتطفيه عبر هاك المفتاح الي في الحيط، لكن أجهزة الكمبيوتر الكمومية يمكن أنو توجد في برشة حالات عديدة ومتعددة في وقت واحد، يعني تخيل مفتاح الضوء الي حكينا عليه على الحيط، تولي تنجم في نفس الوقت تطفيه وتشعلو، في نفس الوقت بالضبط، الخاصية المميزة هذي تخلي تجعل أجهزة الكمبيوتر الكمومية قوية بشكل لا يصدق باش تعمل مهام دقيقة معينة، ولكنها كذلك حساسة برشة ويصعب التعامل معها، يعني الحالات الكمومية هي طبعا هشة لدرجة لا تصدق لدرجة أنو أقل اضطراب من البيئة يمكن أنو يفسد الحسابات، كاينك قاعد تبني في دار من الورق، توصل لشكل كبير معين، أقل نسيم صغير متاع هواء يطيح كل شيء، هذي هي القصة، الكمبيوترات الكمومية معروف انو صعيب برشة نبينو أحجام ضخمة منهم لأنهم كمثال البيت من الورق المقوى، وقت يكبرو برشة يوليو غير مستقرين.

وهنا جاء الإكتشاف المذهل هذا، الفريق لقى طريقة يربطوا بها ك الحالات الكمومية الدقيقة بين أجهزة كمبيوتر منفصلة باستخدام عملية تسمى النقل الآني الكمي أو quantum teleportation، حققوا هذا من خلال ما يعرف بالتشابك أو Entanglement وهي ظاهرة كمومية غامضة وين زوز جسيمات أو أكثر يوليو مرتبطين بشكل عميق لدرجة أنو أي شيء يصير لأحدهم يؤثر على الفور على الآخر، بغض النظر عن مدى تباعدهم، تتذكروا هنا طبعا أينشتاين وين أطلق على الظاهرة هذي اسم “العمل المخيف عن بعد” أو spooky action at a distance، هنا، وباستخدام الاتصال الساحر هذا، الفريق عمل حساب كمي معقد يتسمى خوارزمية غروفر أو Grover’s algorithm عبر الزوز أجهزة بمعدل نجاح 71٪؜ وهذا يشبه وجود زوز عقول منفصلة يكملو فكرة وحدة مع بعض بنجاح، وهو إنجاز كان يُعتقد قبل أنو من المستحيل تحقيقو، وحتى كان صارت “معجزة” وصار، استحالة يوصل للنسبة الهائلة هذي ولكنو صار.

الاختراق العلمي الرهيب هذا يمكنو أنو يغير الحوسبة الكمومية رأسا على عقب، في الوقت الحالي وكما ذكرنا لفوق، بناء أجهزة كمبيوتر كمومية أكبر كانت حاجة صعبة جدا لأنو يولي من الصعب التحكم فيها، ولكن عبر الإكتشاف المتميز هذا، جاب معاه طريقة تحل المشكلة عن طريق ربط أجهزة الكمبيوتر الكمومية الأصغر بشبكة، كيف الطريقة متاع اتصال أجهزة الكمبيوتر العادية بالإنترنات، يعني بدل صناعة حواسيب كمومية كبيرة تولي غير مستقرة، باش يكون فما ربط كمومي ونقل آني يخلي مجموعة كبيرة من الحواسيب هذم يشتغلو مع بعض كعقل واحد جبار، وتخيل الباقي يا عزيزي …

المراجع للتعمق – الورقة البحثية هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون