لماذا وُجِد جنس الذكر والأنثى وكيف كان التكاثر مع بزوغ فجر الحياة على الأرض؟  

وجود الذكور والإناث، أو ازدواج الشكل الجنسي أو المعروف باسم dimorphism، هو الحقيقة جانب أساسي في التطور متاع الأنواع، بما في ذلك نحن كبشر في النهاية، الظاهرة هذي نشأت من خلال عملية التكاثر الجنسي، والي وفّرت مزايا تطورية كبيرة مقارنة بالتكاثر اللاجنسي، هنا، الغرض الأساسي من التكاثر الجنسي هو زيادة التنوع الجيني بين السكان، والتنوع الجيني حاجة محورية طبعا لبقاء النوع لأنه يعزز القدرة متاعو على التكيف مع البيئات المتغيرة وتخليه عندو قدرة كذلك مقاومة الأمراض، كذلك، وقت زوز افراد يجمعوا المادة الوراثية متاعهم فإنو النسل الناتج باش يكون عندو تركيب جيني فريد، الشيء الي يزيد من فرص بعض الأفراد في البقاء على قيد الحياة والازدهار في ظل الضغوط البيئية المختلفة. 

تواجد وتطور الذكور والإناث يرجع إلى الكائنات حقيقية النواة المبكرة، يعني، في البداية، الكائنات هذي تكاثرت لاجنسيا وكوّنت بذلك نسخ من نفسها، (النوع هذا من التكاثر موجود طبعا لليوم عند بعض النباتات والبكتيريا) ومع ذلك، الطفرات الي جات ممبعد أدات إلى تطور أنواع مختلفة من التزاوج، والي تطورت في النهاية إلى جنسين مختلفين، التطور هذا صار حوالي 1.2 إلى 1.5 مليار سنة لتالي، آنذاك، الأمشاج بدات تتخصص وين الذكور بداو ينتجوا في حيوانات منوية والإناث تنتج بويضات، والشيء هذا عزز الكفاءة الإنجابية وحطها على الطريق. الحيوانات المنوية صغيرة برشة ومتحركة، ومصممة للسفر ومهمتها تخصيب البويضات، في حين أنو البويضات أكبر حجم وغنية بالمغذيات ومصممة باش تدعم المراحل الأولية من التطور، التقسيم هذا متاع الأدوار الإنجابية زاد من فرص نجاح الإخصاب وتطور النسل من وقتها.

التطور متاع dimorphism ساهم كذلك في التطور متاع الخصائص الجنسية الثانوية، وهي هاك السمات الي تميز الذكور عن الإناث خارج الأعضاء التناسلية متاعهم، السمات  هذي نشأت وتنشأ بسبب الانتقاء الجنسي، وهو نوع من الانتقاء الطبيعي وين الأفراد الي عندهم خصائص معينة يكونو أكثر عرضة باش يجذبو الأقران متاعهم ويتكاثروا معهم، يعني، ناخذوا مثال هنا، عند برشة أنواع من الطيور الذكور يطورو سمات كيف الريش اللامع، أو سلوكيات التودد المتقنة، أو زيادة الحجم للتنافس على جذب انتباه الإناث، والسمات هذي مثلا تشير بوضوح إلى اللياقة الوراثية، الشيء الي يدل على أنو الذكر يمتلك جينات جيدة يمكن أنو ينقلها إلى النسل، الإناث بدورهم طورو  سمات تخليهم أكثر كفاءة في رعاية وحماية صغارهم، الشيء الي يضمن بقاء ونجاح النسل متاعهم.

عند الجنس البشري كذلك، الإختلافات في dimorphism هذي أو مثنوية الجنس بين الذكور والإناث شكلت الأدوار الاجتماعية والوظائف على أساس السمات الجسدية كيف القوة وغيره. بمرور الوقت، الأدوار تغيرت مع التقدم الثقافي والتكنولوجي وغيره، وفي النهاية، وجود الذكور والإناث وتطور التكاثر الجنسي حاجة محورية في الحياة على كوكب الأرض وهامة جدا جدا للصحة الوراثية والقدرة على التكيف عند الأنواع، مثنوية الجنس هذي سمحت بدمج المادة الوراثية بطرق تعزز التباين وإمكانية التكيف، وفي حين أنو التفاصيل متاعها يمكن أنو تختلف بشكل كبير عبر الأنواع، فإنو المبدأ الأساسي المتمثل في زيادة التنوع الجيني يقعد هدف رئيسي لهذا للمسار التطوري هذا.

المراجع للتعمق هنا وهنا وهنا وهنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون