النمل يجري عمليات بتر معقدة شبيهة بالبشر في سابقة علمية

في ورقة بحثية جديدة عملوها فريق من الباحثين من جامعات ومراكز بحثية مختلفة من اليابان، ألمانيا وسويسرا، وتنشرت في دورية Cell، لقاو أنو فما نوع معين من النمل، معروف باسم النمل الحفّار أو النمل النجّار أو Carpenter ant، في ولاية فلوريدا الأمريكية والمعروف علميا باسم (Camponotus floridanus) أصبح يعمل في عمليات جراحية معقدة منقذة للحياة على بني جنسو المصابين بإصابات خطيرة، وهذا يخليه حاليا الكائن حي الوحيد على البشر الي تم رصدو أنو يعمل في شيء مشابه، الفريق تصدم أكثر وقت اكتشف إنو النمل هذا ينجم بكل سهولة يشخّص الجروح في الأطراف عند اصحابو ويقرر البروتوكول العلاجي وفق ذلك، إما تنظيف الجرح أو بتر الطرف المصاب، أي نعم عزيزي القارئ، ما أنت بحالم !

الفريق ركّز على نوعين من الجروح الي في الأطراف عندهم، التمزقات الي تجي في العظم متاع الفخذ، والأخرى الموجودة في أسفل الساق، ولقاو، أنو النمل يعالج الإصابات متاع عظم الفخذ عن طريق أنو ينظّف الجرح بفمو قبل ما يعمل عملية البتر متاع الساق عن طريق عضها ا بشكل متكرر، في المقابل، الجروح الخفيفة الي في الساق يعالج فيها بالتنظيف فقط، والعلاجات هذي أدات إلى تحسينات كبيرة في معدلات البقاء على قيد الحياة عند النمل المصاب، وين ارتفعت معدلات البقاء على قيد الحياة لإصابات عظم الفخذ من أقل من 40٪؜ إلى ما بين 90 و95٪؜ تخيل يعني، خاصة مع عمليات البتر الناجحة، بينما ارتفعت معدلات البقاء على قيد الحياة لإصابات الساق من 15٪؜ إلى 75٪؜ بعد التنظيف.

الدراسة كشفت كذلك أنو سلوك البتر هذا عند النمل هو الحالة الوحيدة المعروفة من عمليات البتر المتطورة والمنهجية الي يقوم بها كائن حي آخر غير البشر، وفي دراسة سابقة صارت عام 2023، لقاو أنو فما نوع من النمل الأفريقي، يعرف باسم Megaponera analis، ينجم كذلك يعالج الإصابة عند صحابو باستخدام مادة مضادة للميكروبات يتم إنتاجها في الغدد متاعهم، ولكن في الدراسة الحالية، وبما أنو النمل النجار في فلوريدا يفتقر إلى الغدد هذيكا الي يمتلكها النمل الإفريقي، فالفريق حب يفهم كيفاش بالضبط يتعاملو مع الجروح، توا البتر واضح، لكن الجروح كيفاش يداوويها بالضبط؟ والنتائج جات ممبعد باش تقول إنو قدرة النمل على تشخيص وعلاج الجروح هي قدرة فطرية، لأنو ما لقاوش حقيقة أي دليل على التعلم المسبق.

باش يفهموا طريقة وسبب البتر، الفحوصات متاع التصوير المقطعي المحوسب أظهرت أنو إصابات عظم الفخذ تلحق ضرر كبير بالعضلات الي تضخ الدم، الشيء الي يتسبب في تباطؤ الدورة الدموية ويعطي النمل الوقت باش يعمل بتر للطرف قبل أنو ينتشر الدم المحمل بالبكتيريا، وفي المقابل، الجروح متاع الساق تحتوي على أنسجة عضلية أقل، الشيء الي يسمح للعدوى بالانتشار بشكل أسرع، الشيء الي كذلك يخلّي التنظيف علاج أكثر فعالية بدل البتر، يعني النمل هنا، يحط بروتوكول علاجي مناسب بالضبط حسب الوضعية، حسب درجة الخطورة، وحسب الحالة الكل، تماما، كما يعمل الجراح البشري، الي يحط بروتوكول معين باش يداوي به المريض.

المراجع للتعمق – الورقة البحثية هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون