الكشف عن أسرع مجهر في العالم يلتقط حركة الإلكترون في الأتوثانية

25 سنة لتالي، العالم المصري الأمريكي أحمد زويل يفوز بجائزة نوبل في الكيمياء تقديرا لأبحاثو الرائدة في مجال كيمياء الفيمتو، وين طور تقنية جديدة تسمح بأننا نرصدو الحركة متع الذرات والجزيئات وقت تصير التفاعلات الكيميائية بالفيمتو ثانية، يعني جزء من مليون مليار من الثانية، الإكتشاف المبهر هذكا طبعا عمل ثورة في المجال وفتح باب كبير برشة كان مغلق، بعد 25 سنة، نهارات لتالي، مصر يبدو أنها مصممة باش تواصل في المشوار هذا حتى بطريقة مغايرة، أيامات لتالي تخرج ورقة بحثية ثورية بكل المقاييس يعلنو فيها فريق متاع باحثين من جامعة أريزونا بقيادة البروفيسور الألمعي المصري محمد حسن وتنشرت في دورية Science Advances أنهم وعبر اختراق علمي كبير توصلو باش يصنعو أسرع ميكروسكوب في العالم الي قادر أنو يلتقط الحركة متع الإلكترون بالأوتوثانية، يعني هاك الفيمتو ثانية تزيد تقسمها على ألف (مجال بحثي مغاير قليلا لكن نفس المبدأ).

باش نفهمو الأوتوثانية هي ببساطة 10 أس ناقص 18 أو 10 puissance -18 يعني جزء من مليار من مليار من الثانية، يعني الأوتوثانية بالنسبة للثانية عبارة على 31.75 مليار سنة، يعني أكثر من ضعف عمر الكون المرصود، تخيل، المهم، المجهر الثوري هذا جاء عبارة على قفزة عملاقة في التكنولوجيا حقيقة الشيء الي باش يسمح للعلماء باش يراقبوا العمليات السريعة برشة والي مش ممكن أصلا نستوعبوها بسهولة الي تصير على المستوى الذري، هنا، ومن خلال تحقيق الدقة الزمنية المبهرة هذي، الإختراع الجديد باش يفتح آفاق جديدة وخاصة باش يفتح باب جديد وكبير كان مغلق باش ندرسوا ونفهموا السلوك متاع الإلكترونات في المواد والتفاعلات المختلفة وغيره.

الجوهر متاع التقنية هذي هو استخدام نبضات ليزر فائقة السرعة، النبضات هذي قصيرة برشة برشة ويتم توقيتها بدقة دقيقة باش يجمّدوا الحركة متع الإلكترون، وقت يتم التقاط  سلسلة من هذه الدفقات bursts القصيرة متاع الضوء، المجهر هذا ينجم يلتقط لقطات تفصيلية للحركات متع الإلكترون وقت تصير، يعني الشيء يشبه لالتقاط جسم سريع الحركة في سلسلة من الصور السريعة، ولكن طبعا على نطاق أصغر برشة برشة وسرعة أعلى بكثير، هنا، وقبل ما يصير الإختراق العملي هذا، الميكروسكوبات التقليدية كانت تفتقر إلى الدقة الزمنية اللازمة باش تراقب لحركات متاع لإلكترون بشكل فعّال. الإلكترونات هذي تتحرك بسرعة خرافية بحيث مستحيل تقدر تلتقط السلوك متاعها ك بواسطة تقنيات التصوير القياسية التقليدية، وهنا جاء الإختراع الجديد هذا وين يزامن النبضات متاع الليزر مع الحركة متاع الإلكترونات، الشيء الي سمح للفريق باش يشوف التحولات والتفاعلات متاعهم في الوقت الفعلي، على المباشر يعني.

الإكتشاف هذا أكيد جدا باش يعمل ثورة حرفيا، يعني في النهاية القدرة على مراقبة الإلكترونات ومعالجتها بالدقة هذي باش توصلنا لقدم كبير وجبّار في علوم المواد والحوسبة الكمومية والكيمياء ومجالات البحث الأخرى المتعلقة بهم، ذِكْر البروفيسور المصري الألمعي قائد البحث هنا مش من قبيل “فخر العرب” أو خلافه من الحشو اللغوي، العلم ما عندوش جنسية وغير مهم الأشخاص بقدر النتيجة والقيمة المضافة للبشرية، لكن كنت سمعتو في حوار قبل قال أنو من وقت كان في معهد ماكس بلانك الألماني كان فخور جدا بأحمد زويل كمثل أعلى ويحب حتى هو ينسج على المنوال يوصل لحاجة متقدمة يوما ما، وهذا هو شنو معناها شخص كيفاش يؤثر في أجيال كاملة، يعني هنا مصر عطات نوبل في الكيمياء، وربما مجددا تعطي نوبل ثانية لكن في الفيزياء بهذا الإكتشاف الثوري. لا شيء مستحيل وقت تحط صوب عينيك هدف ما وتكون مهووس (إيجابيا به) خاصة في العلوم والمعارف، هاك الديسك المشروخ متاع دور الضحية ديما والعالم الكل يكرهك، ما عندو ما يقدم بل يجبد لتالي، الأفضل أنو نشعلو الشموع بدل لعن الظلام كل يوم، خاصة في منطقتنا.

المراجع للتعمق – الورقة البحثية الثورية هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون