سلالة من النياندرتال انعزلت عن البقية لمدة 50 ألف سنة في أوروبا

قبل حوالي 430 ألف سنة، وخلال العصر البليستوسيني Pleistocene الأوسط والمتأخر، ظهر انسان النياندرتال في أوروبا وآسيا، ثم بعد مئات الآلاف من السنين، وكما نعرفوا انقرض رسميا قبل حوالي 40 ألف سنة لفائدة الإنسان العاقل، الي رغم أنو تزاوج معه في جبال زاغروس الي كتبنا عليها أيامات لتالي، إلا أنو في النهاية الإنسان العاقل فسخو من الخريطة، بفضل برشة حاجات أهمها الذكاء الخارق الي برز خلال الثورة المعرفية الذهنية الكبرى. هنا، وفي مخرج بحثي غريب طلع البارح، عبر ورقة بحثيّة جديدة وهامة جدا، قاموا بها باحثين من جامعات أوروبية مختلفة، فرنسا، النمسا، ألمانيا، الدانمارك، وتنشرت في دورية Cell، نجحوا فيها باش يعملو تسلسل Sequencing أو Séquençage للحمض النووي متاع نسل مختلف من انسان النيادرتال يتسمى ثورين Thorin الي عاش قبل حوالي 42 ألف سنة، والي على ما يبدو كان من بين آخر النوع متاعو، البقايا متاع ثورين هذا الي اكتشفوها عام 2015 في كهف ماندرين الصخري في جنوب فرنسا، (قريب مدينة غرونوبل) تتكون بشكل أساسي من أسنان وشظايا متاع الجمجمة متاعو، ومن وقتها دراستها بدات على قدم وساق.

هنا، وعلى الرغم من البقايا الجسدية المحدودة هذي، تحليل الحمض النووي قدّم معلومات جبّارة حول النسب الجيني لثورين هذا، وكشف أنو المجموعة متاعو أو نسلو من إنسان النياندرتال كانت معزولة عن المجموعات السكانية الأخرى متاع النياندرتال وقتها لمدة 50 ألف عام، الاكتشاف الكبير هذا طبعا يسلط ضوء جديد على الأيام الأخيرة لإنسان النياندرتال والعوامل الوراثية الي ربما ساهمت في انقراضو كذلك، العينة هذي سماوها ثورين نسبة لشخصية Thorin Oakenshield في رواية The Hobbit الي كان عندو اصرار وعزيمة كبيرة باش يعيش ويواصل، المهم، نسل ثورين هذم في الحقيقة عاشوا في فترة بدى فيها الإنسان العاقل يقتحم ويتوسع في أوروبا، ثم قبل حوالي 100 ألف عام، وبعد انتهاء العصر الجليدي، درجة الحرارة متاع المناخ ارتفعت، الشيء الي أدى إلى تغيير الموائل والموارد المتاحة في إسبانيا، وهنا المجموعات السكانية من النياندرتال غادي صار عليها تغيير كبير، حل محلهم مجموعات جديدة من النياندرتال كانو أكثر ملاءة وتكيف مع الوضع، خلال الوقت هذا، الإنسان العاقل كان كذلك قاعد يهاجر ويتحرك إلى أوروبا، الشيء الي زاد من تعقيد الديناميكيات بين المجموعات البشرية المختلفة وقتها، ومع ذلك، نسل ثورين قعدوا معزولين، وحافظوا على نسبهم الجيني المتميز دون أن يعملو أي اتصال مع مجموعات أخرى لا من نياندرتال ولا من الإنسان العاقل، حتى وقت بدا الإنسان العاقل هذا يسيطر على القارة كاملة.

الدراسة لقات أنو مجموعة ثورين تنتمي إلى مجموعة غير معروفة من إنسان نياندرتال في البحر الأبيض المتوسط، والي عاشت من إسبانيا إلى فرنسا، ومع ذلك، نظرا لأنو المادة الوراثية من الحفريات هذي ماهيش مكتملة، فحاليا مازال مش واضح شكون هي المجموعة هذي بالضبط، الواضح والبيّن حاليا هو أنو أسلاف ثورين ما تزاوجوش مع إنسان نياندرتال ولا مع الانسان العاقل ولا مع أي أحد منذ عشرات الآلاف من السنين، الفترة الطويلة من العزلة هذي خلاتهم على ما يبدو عرضة للانقراض لأنهم ما استفادوش من التنوع التنوع الجيني الي يجي من الإختلاط متاع الأنسال والمجموعات السكانية الأخرى، هنا، وبقطع النظر عن الأدلة الجينية، النتائج الأحفورية أشارت إلى أنو سكان ثورين كانوا كذلك منعزلين ثقافيا، وهذا مجددا يكون ساهم في تراجعهم واندثارهم في نهاية المطاف، لأنو الروابط الثقافية مهمة برشة لتبادل المعرفة والتكنولوجيا والابتكارات الي يمكن أنها تساعد السكان على البقاء أحياء، وعلى العكس من هذا، الإنسان العاقل، حافظ على روابط ثقافية صلبة جدا وقتها في جميع أنحاء أوروبا، وهو ما زودهم بميزة حاسمة باش يسيطروا، هنا، ومع اختفاء إنسان النياندرتال شوية شوية، البشر العاقل قعد يزدهر، وهذا مجددا يوري أنو قداش الروابط الاجتماعية عندها دور محوري، ساهمت مع برشة أسباب أخرى في اكتساحنا للأرض وانقراض إنسان النياندرتال، وتوري أنو العزلة خطيرة جدا، وفتكت كما قرينا بنسل الثورين الي انعزلو 50 ألف سنة.

المراجع للتعمق – الورقة البحثية هنا

 مصطلحات متعلقة:

نسل ألتاي أو حفرية ألتاي أو  Altai: حفرية تعود لإنسان النياندرتال اكتشفو البقايا متاعها في كهف أوكلادنيكوف في جنوب سيبيريا سنة 2007، العينة هذي كانت استثنائية بكل المقاييس لأنها كانت محافظة بشكل كبير برشة على المادة الوراثية متاعها، الشيء الي سمح وقتها بأبحاث رائدة في علم وراثة إنسان النياندرتال وعلاقتو بالإنسان العاقل.

نسل فنديجا أو حفرية فنديجا Vindija: حفرية تعود لإنسان النياندرتال، اكتشفو بعضها في كهف فنديجا في كرواتيا في سنة 1974 ثم في 1980، وقدمت كذلك رؤى هامة برشة حول حياة إنسان نياندرتال والتركيب الجيني متاعو قُبيل انقراضو رسميا، كما أنها قدمت أدلة هامة ودقيقة حول الأسلوب متاع حياتهم وسلوكهم وعلاقتهم بمجموعات إنسان نياندرتال الأخرى.

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون