التطور يضرب من جديد في كوستاريكا

نظريّة التطور أو مبرهنة التطور أو كما نصيغها بالإنجليزية أفضل Paradigm التطور، وعبر الإنتخاب الطبيعي، قاعدة تسجل في أهداف نظيفة ودقيقة في كل لحظة على هذا الكوكب الأزرق الجميل، وكل يوم تزيد الأدلة العلمية الدامغة لرفوف العلم والمعرفة، بعيدا عن “محطمّيها” الذين يحاربون طواحين الهواء يمنة ويسرة، هنا، وفي قلب أمريكا الوسطى، وفي غابات كوستاريكا الإستوائية، التطوّر، يضرب من جديد عبر أحد أروع الأمثلة الممكنة. في ورقة بحثية جديدة قامو بها فريق من الباحثين من جامعة ولاية نيويورك في بينغامتون وتنشرت في دورية Proceedings of the Royal Society، لقاو أنو فما كائن حي يعيش هناك، طوّر ميكيانيزم جديد ومذهل للبقاء على قيد الحياة في بيئة معروفة بأنها خطيرة جدا.

الي أمامنا في الصورة، اسمها أنول الماء أو Water Anole أو المعروفة باسمها العلمي Anolis aquaticus، سحلية شبه مائية (يعني تعبش في الماء وعلى اليابسة) موطنها الأصلي التيارات المائية والأنهار في كوستاريكا، السحلية العجيبة هذي طوّرت ميكانيزم مبهر يسمحلها باش تقعد تحت الماء لمدة طويلة توصل إلى 20 دقيقة وأكثر، عن طريق أنها تستخدم فقاعات الهواء الي تتكون على الخطم متاعها أو Snout أو بالفرنسية Museau، التكيف العبقري هذي، تم تطويرو باش يخدم كاستراتيجية فعالة تقدر تكافح بها الحيوانات المفترسة الفتاكة الي تعج بها المنطقة هذيكا، الشيء الي يمكّنها باش تهرب وتعيش. التقنية الفريدة عذي تشتغل وقت السحلية تغوص في الماء، عندها تبدى تزفر (من الزفير) في الهواء الي يتجمع حول منخريها ويشكل بذلك فقاعة تعمل كخزان متاع تنفس وقت تتغمر كليا بالماء، الأنول هذي جلدها أصبح Hydrophobic طارد للماء، يعني وقت تدخل تحت الماء، الماء ما يلتصقش بالجلد، بل الهواء هو الي يتلصق، وهي حاجة محورية في العملية، لأنها تسهل تكوين فقاعة الهواء وتقعد كما ذكرنا لمدة معتبرة، وهكا، تعزز القدرة متاعها باش تقعد تحت الماء من غير ما تغرق.

الفريق لقى كذلك أنو السحلية هذي ولات قادرة كذلك على أنها تعاود تتنفس نفس الهواء المحصور في الفقاعة بشكل عادي جدا، الشيء الي يزيد يطول في المدة متاعها تحت الماء أكثر فأكثر، هنا، الأهمية التطورية للتكيف هذا تبدى واضحة من خلال الآثار متاعها على الانتقاء الطبيعي والبقاء في البيئة المائية، يعني قدرة السحلية هذي باش تقعد مختبئة تحت الماء مش فقط تقلل بشكل كبير من خطر الافتراس، بل تسمحلها كذلك باش تستغل مكانها الإستراتيجي وين تولي تبحث عن الطعام، وخاصة اللافقاريات الصغيرة كيف الحشرات والقشريات، من جهة أخرى، السمات التشريحية للسحلية هذي، بما في ذلك جسمها النحيل وأقدامها الدقبقة، تعزز قدراتها على السباحة، الشيء الي يسمحلها باش تتنقل بكفاءة عبر موائلها في المياه العذبة، الفريق لقى كذلك أنو شكل رأس السحالي هذم لعب دور محوري في تحسين تكوين الفقاعات والاحتفاظ بها، الشيء الي يشير إلى أنو صار تطور وتكيف فيزيولوجي صار جنبا إلى جنب مع تطور الاستراتيجيات السلوكية. 

التنفس عبر الفقاعة هذا يتضمن سلوك يُعرف باسم الضخ الحلقي أو gular pumping وين تبدى السحلية هذي تعمل في حركات حلق إيقاعية تعاونها باش تدوّر الهواء في وسط الفقاعة، الشيء الي يسمحلها باش تنقي الأوكسجين  بكفاءة، الآلية هذي تمكنها باش تستنشق الهواء الغني بالأكسجين من الفقاعة وقت تدخل تحت الماء، وكذلك باش الهواء يقعد نظيف وصالح للتنفس حتى بعد مرور وقت، الشيء الي يزد يطوّل مدة الغوص أكثر فأكثر،  المدة الطويلة هذي حيوية لتجنب الافتراس، وين تولّي السحلية مع توفّر الأوكسجين تعتمد على التمويه والسكون باش تتجنب ك التهديدات، وهكذا اشتغل التطور والتكيف وأبدعوا في هذا الميكانيزم الجديد الي لم يتم رصده عندهم من قبل أبدا.

المراجع للتعمق – الورقة البحثية هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون