اللدائن البلاستيكية وجدت بشكل كبير في السائل المَنَوِيّ البشري مؤذنة بكارثة قادمة

أيامات لتالي نشرنا مقال عن ورقة بحثية لقات أنو اللدائن البلاستيكية أو Microplastics لقاو أنها موجودة في برشة تجلطات دموية، ومسؤولة عن برشة جلطات. البارح تخرج ورقة بحثية جديدة قاموا بها فريق من الباحثين من جامعات بحثية مختلفة في الصين وتنشرت في دورية journal Science of the Total Environment في الغرض. بعد البحث والتحقيق في احتمالية دخول اللدائن البلاستيكية لأجزاء أخرى من الجسم، لقاو فيها أنو أن كل عينة من السائل المنوي الي صار عليهم البحث في سلسلة التجارب احتوات بشكل صادم على المواد بلاستيكية الدقيقة هذي أو Microplastics.

الدراسة شملت 36 رجل بالغ يتمتعو بصحة ممتازة من مدينة جينان في شرق الصين، والي عمرهم ما خدموا في مجال البلاستيك وما عندهمش به علاقة يعني أصلا، وكل مشارك في البحث منهم، قدم عينة من السائل المنوي متاعو للتحليل، والنتائج الي جات، لقاو اللدائن الدقيقة، في كل عينة من العينات متاع السائل المنوي الي تم تقديمها، الكل، بدون أي استثناء، اللدائن هذي عبارة عن جزيئات بلاستيكية صغيرة يقل حجمها عن 5 مم، موجودة في كل مكان على الأرض تقريبا، وفي الأعضاء البشرية المختلفة، تخيل أنو أبحاث سابقة لقات أنو الشخص العادي منا يستهلك كمية من البلاستيك تعادل بطاقة ينكية أسبوعيا، اخيل يعني، وهذا الكل يدخل للجسم وقت نشربوا مثلا من الزجاجات البلاستيكية، ونستنشقوا الجزيئات المحمولة في الهواء، ووقت ناكلو الطعام السخون في حاويات بلاستيكية.

في الدراسة، تم معالجة عينات السائل المنوي عن طريق خلطها بمحلول كيميائي، ثم رشحوها وحللوها مجهريا. لقاو كما قلنا بلاستيك عند الجميع، وحددوا 8 أنواع مختلفة من البلاستيك، وكان البوليسترين هو الأكثر شيوعc البوليسترين هذا نستعملوه على نطاق واسع في مواد التعبئة والتغليف، كذلك الفريق لقى علاقة مباشرة بين وجود جزيئات بلاستيكية من مادة البولي فينيل كلورايد (PVC) وانخفاض حركة الحيوانات المنوية في العينات متاع السائل المنوي، حركة الحيوانات المنوية كما نعرفو، تعتبر عامل حاسم ومحوري في الخصوبة عند الرجال، والنتيجة المرعبة أشارت إلى أنو جزيئات PVC مرتبطة بانخفاض حركة الحيوانات المنوية وبالتالي على ما يبدو باش تساهم في انخافض حاد في معدلات الخصوبة العالمية.

المراجع للتعمق – الورقة البحثية هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون