مستحضرات تجميل وواقيات شمسية وجد أنها خطيرة جدا على البشر

في ورقة بحثية جديدة وصادمة عملوها فريق من جامعة برمينغهام وتنشرت في دورية Environment International لقاو وفي خبر مفزع، أنو المواد المعروفة باسم الفاعلات بالسطح الفلورية أو Per- and polyfluoroalkyl substances أو بالفرنسية Substances per- et polyfluoroalkylées أو الي يرمز لها اختصارا PFAS أو المعروفة كذلك باسم Forever Chemicals، تنجم بكل سهولة أنها تمر وتتعدى بكل انسيابية عبر الجلد متاع الإنسان، عكس ما كان يتوقع قبل يعني، المواد الكيميائية هذي، مستخدمة في برشة منتجات كيف واقي الشمس والكريمات المرطبة الخ ووقت تنجح في الدخول للجسم، تبدى وقتها المعاناة رسميا.

المواد هذي كذلك، معروف أنها عندها قدرة على البقاء في البيئة لفترة طويلة برشة يعني المواد الكيميائية هذي ما تتحللش بسهولة من خلال العمليات الطبيعية، هكا علاش تتراكم في التربة والماء والكائنات الحية، الشيء الي يؤدي إلى تلوث بيئي طويل الأمد ومخاطر صحية كبيرة، الدراسة الحالية اختبرت 17 مادة شائعة ومعروفة من PFAS على نموذج ثلاثي الأبعاد متاع الجلد البشري (عندو نفس الخصائص بالضبط)، ولقات أنو 15 نوع منها يتعدى بالفعل عبر الجلد ويتم امتصاصو بكل سهولة خلال 36 ساعة، الجديد بالذكر هنا أنو مادة PFOA (الموجودة كمكون رئيسي فيه) هذي، وهي مادة مسرطنة محظورة مثلا في الولايات المتحدة، كانت من بين المواد الي تم امتصاصها ودخلت للجسم رسميا.

المواد الكيميائية الي تنتمي PFAS هذي موجودة حقيقة في العديد من المنتجات اليومية الي نستعملوها في حياتنا، وهذا يعني أنو الناس قاعدة تعرض في روحها الخطر بشكل يومي دون أن تعرف، الفريق أوضح كذلك أنو الطبيعة المؤينة متاع PFAS، الي تطرد الماء والبقع، كان يُعتقد أنها تمنع الإمتصاص عبر الجلد، لكن الدراسة أظهرت بكل دقة أنو هذا ماهوش صحيح، هنا شرح بسيط للعملية، الطبيعة المؤينة ionized متاع المادة تعني أنها تحتوي على شحنة كهربائية تنجم تتفاعل مع جزيئات الماء والبقع، التفاعل هذا يصدّ الماء والبقع الي حكينا عليهم، وين تشكل الجزيئات المشحونة حاجز يمنع المواد هذي من أنها تلتصق بالأسطح الي تحطت عليها كريمات أو مستحضرات تنتمي لمادة PFAS.

يعني مثلا، هاك واقي الشمس الي مصصم خصيصا باش يحميك من الأشعة فوق البنفسجية ويعقد يشتغل حتى بعد ما تدخل للماء مليون مرة، هاك الماكياج الي ما تنحاش من الوجه ويقعد حتى بعد ما تغسل وجهك، والي ينظر له ديما على أنو شيء فخم، وغيرهم، في الحقيقة هم قنابل مؤقتة حسب مخرجات الدراسة الدقيقة، وفي حال عبرت المواد هذي للجسم، عدى عن السرطان، فحقيقة تنجم تتسبب في برشة مصايب على غرار تلف الكبد، اضعاف جهاز المناعة، اصطراب الهرمونات، أمراض القلب والأوعية الدموية، أمراض الكلى، ومن المستحسن الإبتعاد عنها قدر الإمكان حسب البحث والتقليل من استخدامها للحد الأدنى اذا انت ما تنجمش تستغنى عنها، وديما تثبت وتشوف هل يكون فيها مكوّن يتبع المادة هذي أو لا (أنظر التنويه في التعليقات للشرح)، هل يوجد منتجات خالية منها تماما أو لا، رغم الي صعيب شوية كيميائيا يعني.

المراجع للتعمق – الورقة البحثية هنا

ياسين خضراوي

كاتب، مدقق، مترجم وكاتب مقالات علمية ومحرر في كافة مشاريع ويكيميديا، ومؤسس منظمة الباحثون التونسيون